Yamal g‘ozlari Qora dengizdan ko‘ra O‘zbekistonni ma’qul ko‘rdi

Sibirning Yamal yarimorolidan uchgan chiyildoq g‘ozlar to‘dasidan bir guruh qushlar ajralib chiqib, Qora dengiz tomon uchish o‘rniga, qishlash uchun O‘zbekistonda qoldi. Bu haqda, qushlarga o‘rnatilgan GPS-navigatorlar taqdim etgan ma’lumotga asoslanib, “Megatyumen” nashri xabar bermoqda.

Qizil kitobga kiritilgan chiyildoq g‘ozlar, odatda, ovlash uchun ruxsat etilgan oqpeshona g‘ozlar bilan janubga uchar, shu sababli ham ovchilar tahdidiga uchrardi.

Ornitologlarning kuzatuvlariga ko‘ra, Yamal g‘ozlari yanada chidamliroq ko‘rinishga kirgan. Avvallari bu parrandalar parvoz davomida Xanti-Mansiyskda dam olib o‘tardi, biroq endi bir nafasda, to‘xtamasdan, Qozog‘istonga qadar yetib boryapti.

Olimlarning fikricha, bunga shimoldagi havo harorati o‘zgarishi sabab bo‘lgan bo‘lishi mumkin. Iliq kunlar soni ko‘paygani tufayli parvozga tayyorlanish va yog‘ zaxirasini oshirib olish uchun qushlar ixtiyorida ko‘proq vaqt bo‘lmoqda.