Suriyada zarin zaharli moddasi qo‘llanilishi bilan bog‘liq belgilar aniqlandi

Kimyoviy qurolni taqiqlash tashkiloti (KQTT) ekspertlari Suriyada zarin yoki unga o‘xshash zaharli gazni qo‘llash belgilarini aniqladi, deya xabar bermoqda “Korrespondent.net” KQTT oylik ma’ruzasiga tayanib.

Mutaxassislar Suriyada zaharli moddalarni qo‘llash bilan bog‘liq 11 ta ehtimoliy hodisalarni o‘rganib, shunday xulosaga kelgan. “Shunday holatlardan birida ba’zi qon namunalari tahlili odamlar zarin yoki unga o‘xshash modda ta’siriga uchraganini ko‘rsatdi”, — deyiladi ma’ruzada.

KQTT mutaxassislari ta’kidlashicha, “bunday ta’sir qachon va qanday vaziyatlarda amalga oshgan bo‘lishi mumkinligini aniqlash uchun” chuqurroq tekshiruv olib borish kerak bo‘ladi.

Nashr eslatishicha, avvalroq KQTT Suriyaning kimyoviy quroli AQShdagi zavodda to‘liq yo‘q qilingani xabar bergan edi.