Bahrayn poytaxti Manama yaqinidagi shaharlarda shialik namoyishchilar va politsiya o‘rtasida to‘qnashuvlar bo‘lib o‘tdi. Bu haqda AFP agentligiga tayanib, “TASS” xabar bermoqda.
Agentlik ma’lumotlariga ko‘ra, namoyishchilar Saudiya Arabistonida shia ulamosi, shayx Nimr an-Nimrning qatl etilishi sababli ko‘chalarga chiqdi. Ular huquq-tartibot organlari xodimlariga yonuvchi qorishmali shisha uloqtirdi, bunga javoban politsiya ko‘zdan yosh oqizuvchi gaz va boshqa maxsus vositalarni qo‘lladi. Ba’zi xabarlarga ko‘ra, to‘qnashuv natijasida jabrlanganlar bor.
Eslatib o‘tamiz, Saudiya Arabistoni IIV 2-yanvar, shanba kuni 47 kishini qatl qilgani, ular orasida shia ulamosi Nimr an-Nimr ham borligini ma’lum qildi. Shundan so‘ng Eron poytaxtidagi Saudiya Arabistoni elchixonasiga namoyishchilar bostirib kirdi, ulardan 40 nafari qo‘lga olindi.
Izoh (0)