O‘zbekiston Futbol Federatsiyasi 2015-yilning eng yaxshi murabbiyi va futbolchisini aniqlash bo‘yicha Respublika bo‘ylab so‘rovnoma boshlanganligi haqida e’lon qildi.
2015-yilgi so‘rovnomaning yanada xolisligini ta’minlash maqsadida unda jurnalistlarning mustaqil ravishda to‘g‘ridan-to‘g‘ri ishtirok etishi cheklanadi. Ovoz berish jarayonida tahririyatlar ishtirok etadi.
So‘rovnomada O‘zbekiston va chet eldagi ommaviy axborot vositalarining tahririyatlari ovoz beradi. Mustaqil jurnalist, kolumnist va nyusmeykerlar, shuningdek, sport blogerlarining ovozlari yakunda mustaqil jurnalistlar guruhi ostida birlashtiriladi va bitta ovoz sifatida so‘rovnomada qatnashadi. Futbol klublari va terma jamoalarning matbuot xizmatlari ovozi ham yagona “Matbuot xizmatlari” guruhi ostida birlashtirilib, yagona ovoz sifatida so‘rovnomada ishtirok etadi.
Yilning eng yaxshi murabbiyi va futbolchisi nomi (ikki alohida nominatsiya hisoblanib) umumiy ballar yig‘indisiga qarab aniqlanadi.
Har bir tahririyat 3 nafar murabbiy va 3 nafar futbolchini mukofotga loyiqlik darajasi bo‘yicha birinchi, ikkinchi va uchinchi o‘rinlarga qo‘yib chiqadi. Ikkala nominatsiya bo‘yicha ham 3 ta qator to‘ldirilishi shart.
Futbolchi va murabbiylar uchun berilgan ovozlar quyidagi tartibda hisoblanadi:
- 1-o‘rin uchun – 3 ball
- 2-o‘rin uchun – 2 ball
- 3-o‘rin uchun – 1 ball
Ovoz berayotgan tahririyat to‘rtta asosiy kriteriyaga rioya qilishi kerak:
- 1. Yil davomidagi individual va jamoaviy ravishdagi yutuqlari
- 2. Iste’dod, iqtidor va Fair Play.
- 3. Karyera
- 4. Shaxsiyati va uning boshqalarga ta’siri
Tahririyat o‘z ovozini rasmiy maktub bilan O‘FF Matbuot xizmatining elektron pochtasiga, shuningdek faks orqali jo‘natishi lozim. Ovoz berish jarayoni 2016-yilning 10-yanvar kuni soat 09:00 da to‘xtatiladi.
Ovozlar quyidagi manzilga jo‘natiladi:
- Manzil: O‘zbekiston shoh ko‘chasi 98 A uy
- Faks: +99871 - 244-16-83. Email: media@the-uff.com
- Toshkent 100011
Izoh (0)