Toshkentning Alisher Navoiy va Amir Temur ko‘chalari kesishgan chorraha yaqinida Mercedes-Benz Conecto Low Floor yo‘lovchi avtobusida yong‘in kelib chiqdi. Facebook’dagi “Voditeli Tashkenta” guruhida qoldirilgan xabarlarga ko‘ra, avtobusning yo‘nalish raqami 53 bo‘lgan.
Avtobusdagi yong‘in 17-dekabr, payshanba kuni tongga soat 7:30—7:45 atrofida yuz bergan. Guruhda soat 7:51 da qoldirilgan xabarga ko‘ra, avtobusdagi olovni yong‘in xavfsizligi xizmati xodimlari o‘chirishga kirishgan edi.
Yong‘in haqidagi xabarga ilova qilingan fotosuratlarda o‘t o‘chirish xizmati mashinalari va xodimlarini ham ko‘rish mumkin. Avtobus yonayotgan vaqtda uning yonida Alisher Navoiy ko‘chasi bo‘ylab boshqa transport vositalarining harakati davom etgan.
So‘nggi bir necha yildan beri Toshkent shahrida yo‘lovchi avtobuslarning yonib ketishi holatlari tez-tez ro‘y bermoqda. Xususan, 2013-yili mart va iyun oylarida, 2014-yili 5-may, 24-iyun, 14-iyul, 1-dekabr, 15-dekabr kunlari, 2015-yili 18-mart, 30-aprel, 15-may, 29-may, 20-iyul kunlari Mercedes-Benz avtobuslari yonib ketdi.
Qayd etish joiz, avtobuslardagi yong‘in holatlarining sabablari yuzasidan “Toshshahartransxizmat” vakillari bir, ikki, uch va kamida to‘rt marta izoh bergan.
Izoh (0)