Toshkent viloyati hokimi Ahmadjon Usmonovning 14-dekabrdagi qaroriga muvofiq, tashkilotlar, korxonalar va muassasalar, shuningdek, xususiy shaxslarga tegishli noturar-joy obyektlarini o‘z egalari hisobidan tashqi videokuzatuv kameralari bilan ta’minlash choralari belgilandi. Bu haqda “Gazeta.uz” xabar bermoqda.
Viloyat Ichki ishlar boshqarmasi hamda shahar va tumanlar hokimliklariga jinoyatchilik yuz berishi ehtimoli yuqori bo‘lgan, shuningdek, gavjum mavze, ko‘chalar va joylarni videokuzatuv moslamalari bilan ta’minlashga alohida e’tibor qaratish haqida ko‘rsatma berilgan.
Qarorda yangi qurilayotgan va rekonstruksiya qilinayotgan barcha noturar-joy obyektlari va inshootlarida videokameralar o‘rnatishni nazarda tutish tavsiya qilingan.
Xususiy uy-joy fondi, nodavlat notijorat tashkilotlari va tadbirkorlik subyektlari obyektlariga kameralarni o‘rnatish esa tavsiyaviy xarakterga ega.
Ayni vaqtda, ko‘p xonadonli turar-joy uylarini videokuzatuv bilan ta’minlash xususiy uy-joy mulkdorlari shirkati mablag‘lari va ularga banklar tomonidan ajratiladigan kreditlar hisobidan amalga oshiriladi.
Ijtimoiy soha va ta’lim muassasalari obyektlari esa mazkur muassasalarning budjetdan tashqari mablag‘lari hisobidan kameralar bilan ta’minlanadi.
2016-yildan boshlab viloyat umumta’lim maktablari, maktabgacha ta’lim muassasalari va barcha budjet tashkilotlari xarajatlari smetasiga qo‘riqlash xizmati xarajatlari ham kiritish belgilab qo‘yilgan.
Qarorda belgilanishicha, zarurat tug‘ilganida, jamoat tartibi va xavfsizligini ta’minlash maqsadida kameralarning yozuvlaridan foydalanish mumkin.
Avvalroq Toshkent shahridagi mahalla, mavze va ko‘chalar, shuningdek, noturar-joy obyektlari videokuzatuv tizimlari bilan ta’minlana boshlangani haqida xabar berilgan edi.
Izoh (0)