Rossiyalik sobiq futbolchi, hozirda Moskvaning “Lokomotiv” klubi murabbiylar shtabida faoliyat olib borayotgan Oleg Pashinin “Futbol” nashriga bergan intervyusida nima uchun o‘z vaqtida O‘zbekiston terma jamoasida o‘ynashga qaror qilganini aytib o‘tdi, deb xabar qiladi “Stadion.uz”.
– Nima uchun O‘zbekiston?– Bu haqda doimo so‘rashadi. Hozir aniq tafsilotlarini eslolmayman. O‘sha paytda O‘zbekiston terma jamoasini Salkov boshqarardi. Uning taklifini ko‘p o‘ylab o‘tirmasdan qabul qildim. O‘shanda Rossiya terma jamoasida o‘ynash uchun imkoniyat yo‘q edi. Qilgan ishlarimdan afsuslanadigan odatim yo‘q. Jumladan, bundan ham.
– Siz fuqarolik pasportini olgansiz, to‘g‘rimi?– Ha, u paytda ikki davlat fuqaroligiga ega bo‘lish mumkin edi. Hozir esa men faqat Rossiya fuqarosi hisoblanaman.
– O‘z vaqtida boshqa mamlakat terma jamoasi uchun mahalliylashtirilgan futbolchi sifatida Rossiya terma jamoasi uchun bunday amaliyotni qo‘llashga qanday qaraysiz?– O‘z futbolchilarimizni tarbiyalash uchun to‘g‘ri siyosat olib borishimiz kerak. Shunda mahalliylashtirish masalasiga hojat qolmaydi. Agar hozirda bunday savol ko‘ndalang turgan ekan, professional futbolchi qaysi jamoa safida maydonga tushishidan qat’iy nazar o‘z ishini yaxshi bajaradi. Menga qolsa, muammoni xorijlik futbolchilar orqali emas, o‘z tarbiyalanuvchilarimiz evaziga hal qilardim.
Ma’lumot uchun, Oleg Pashinin 2001—2005-yillarda O‘zbekiston milliy terma jamoasi safida 12 ta o‘yinda ishtirok etgan.
Izoh (0)