Turkiyaning janubi-sharqida joylashgan Xakkari viloyatidagi shifoxona shifokorlarining iltimosiga binoan noma’lum o‘g‘rilar kompyuterlarni qaytarib berdi. Bu haqda CNN Turk bergan ma’lumotlarga asosan “RIA Novosti” xabar qilmoqda.
Noma’lum shaxslar tomonidan bir necha kun oldin Yuksekova shahar shifoxonasidan uchta kompyuter o‘g‘irlab ketildi. Bemorlarga tegishli bo‘lgan barcha ma’lumot va kasallik tarixlari, shuningdek, barcha tibbiy hujjatlar o‘g‘irlangan kompyuterlarda bo‘lganligi sababli, tibbiyot xodimlari aholiga tibbiy yordam bermay qo‘ydi. Shifokorlar mahalliy OAV va Oilaviy tibbiyot markazi orqali o‘g‘rilarga murojaat qilib, kompyuterlar qaytarilishi lozimligini, aks holda, tibbiy yordamdan mahrum bo‘lgan odamlar, shu jumladan bolalar aziyat chekayotganligini ma’lum qildi.
O‘g‘rilar shifokorlarni eshitdi. 16-dekabr, chorshanba kuni kompyuterlar shifoxonadan 500 metr uzoqlikda bo‘lgan eski-tuski narsalar bilan savdo qiladigan do‘konga tashlab ketildi.
Shifoxona ishini tikladi. Politsiya sodir bo‘lgan voqea yuzasidan surishtiruv ishlarini olib bormoqda.
Izoh (0)