Malayziya poytaxti Kuala-Lumpurdagi xalqaro aeroportda yuk tashuvchi 3 ta Boeing 747-200F’ning egalari qidirilmoqda. Bu haqda CNN xabar berdi.
Aeroport vakillari 7-dekabr, dushanba kuni mahalliy OAVda ikki hafta davomida havo kemalarini olib ketish lozimligi, aks holda ular sotib yuborilishi yoki shunga o‘xshash boshqa qaror qabul qilinishi haqidagi e’lonni joylashtirdi.
Aeroport boshqaruvchisi Zaynul Mohd Isaning bildirishicha, havo kemalari Kuala-Lumpurda bir yildan oshiq vaqtdan beri turibdi. Buning uchun aeroportga to‘lovlar amalga oshirilmay kelinmoqda.
Ma’lumotlar bazasida Islandiyaning Air Atlanta Icelandic kompaniyasi ushbu samolyotlar egasi sifatida qayd etilgan, biroq kompaniya vakillari laynerlar 2008-yildayoq sotib yuborilganini ma’lum qilgan. Shundan beri samolyotlar o‘z egasini bir necha bor o‘zgartirganligi ehtimoldan xoli emas.
Izoh (0)