Rossiyaning Voronej viloyati fuqarosi chaqaloqligida tashlab ketgan onasi bilan 49 yildan so‘ng sudda ko‘rishdi, deya xabar bermoqda “RIA Novosti” mintaqa prokuraturasiga tayanib.
Semilukskiy tuman sudi tuman prokuraturasining 49 yoshli mahalliy fuqaro voyaga yetmagan paytida ota-ona qaramog‘isiz qolgani faktini aniqlash haqidagi so‘rovini qondirdi. Tekshiruv chog‘ida fuqaroning tug‘ilganlik haqidagi guvohnomasida faqat onasi ko‘rsatilgani, u ikki oyligida onasi voz kechgach, bolalar uyiga topshirilgani, shundan beri ota-ona qaramog‘isiz qolgani ma’lum bo‘ldi.
Biroq buni tasdiqlovchi hujjatlari bo‘lmagani tufayli, voyaga yetganidan keyin ham fuqaro imtiyozlarga ega bo‘lish huquqidan foydalana olmagan. U tarbiyalangan muassasalarning hech biri uning onasini onalik huquqidan mahrum etishni so‘rab sudga murojaat qilmagan. Oxir-oqibat, prokuratura ariza beruvchining voyaga yetmagan paytda ota-ona qaramog‘idan ayrilgani faktini aniqlash haqida sudga so‘rov berdi.
Ushbu ish bo‘yicha dalil sifatida arizachining 72 yoshli onasining guvohlik ko‘rsatmalari olindi. Arizachi uni tashlab ketgan onasining taqdiri haqida hech narsa bilmagan, ular sudda fuqarolik ishining ko‘rib chiqilishi yuzasidan ko‘rishdi.
Sud dalolatnomasi qonuniy kuchga kirgach, erkak tegishli imtiyozlarga ega bo‘lish huquqini qo‘lga kiritadi.
Izoh (0)