Facebook kompaniyasidagi aksiyalarining 99 foizini “yaxshiroq olam” qurish uchun sarflashga va’da bergan ijtimoiy tarmoq asoschisi Mark Sukerberg xayriya tashkilotlariga qo‘yilgan cheklovlar tufayli bunday fond uchun mablag‘ sarf qilmaydi, deb yozadi Meduza.
Xayriya tashkilotlariga biznesga sarmoya kiritish va lobbizm bilan shug‘ullanish taqiqlangani Sukerbergga ma’qul kelmagan.
Shu sababli Sukerberg va uning rafiqasi Prissilla Chan o‘z xayriya tashabbusini tijorat tashkiloti sifatida ro‘yxatdan o‘tkazdi. Uning qo‘shimcha qilishicha, tashkilotning bunday shaklda bo‘lishi unga soliqlar to‘lash majburiyatini yuklaydi.
Facebook rahbari so‘zlariga ko‘ra, avvalambor, kompaniya ta’lim, sog‘liqni saqlash, odamlarni birlashtirish va kuchli hamjamiyatlar tuzish bilan shug‘ullanadi.
Eslatib o‘tamiz, Mark Sukerberg va Prissilla Chan yangi tug‘ilgan qiziga maktub yozib, unda qizaloq voyaga yetishi umid qilinayotgan olam haqida hikoya qilgan edi.
Sukerbergning ma’lum qilishicha, u va uning turmush o‘rtog‘i jahondagi barcha bolalar uchun shunday olamni qurishda yordam berish uchun kichik hissa qo‘shadi. “Biz Facebook’dagi aksiyalarimizning 99 foizini — hozirgi vaqtda ularning qiymati 45 milliard dollarga teng — hayotimiz davomida bu olamni keyingi avlodlar uchun yanada yaxshilash uchun yo‘naltiramiz”, — deb yozdi Mark Sukerberg.
Keyinroq Sukerbergning qarori jamoatchilik e’tiborini tortish maqsadidagi harakat deb baholangan, ba’zi jurnalistlar Facebook asoschisining ushbu qadamini tadbirli deb hisoblagan, chunki biznesmen o‘z rafiqasi Prissilla Chan bilan aksiyalarni o‘zlari ochadigan kompaniya orqali sarflashi aytilgan edi.
Izoh (0)