Turkiya bosh vaziri Ahmed Davuto‘g‘li uning mamlakatini iqtisodiy sanksiyalar bilan tiz cho‘ktirib bo‘lmasligini aytdi, deb yozadi “TASS”.
“Turkiyani iqtisodiy sanksiyalar orqali bo‘ysundirish mumkin, deb o‘ylayotganlar adashadi”, — dedi u Bokudagi diplomatik akademiyada nutq so‘zlar ekan.
Turkiya bosh vaziri, shuningdek, Turkiya Rossiyaning 24-noyabr kuni urib tushirilgan Su-24 bombardimonchi samolyoti uchun uzr so‘ramasligini, chunki u o‘z chegarasini himoya qilganini ta’kidladi.
Shu bilan birga, Davuto‘g‘li Rossiya bilan ochiq muzokaralarni saqlab qolishni yoqlab chiqdi.
“Turkiya va Rossiya xalqlari o‘rtasida hech qanday muammo yo‘q. Biz Rossiya bilan munosabatlarga doimo alohida e’tibor bilan yondashganmiz. Hozir albatta eshiklarni muzokaralar uchun ochiq qoldirishimiz kerak, deb o‘ylaymiz”, — dedi u.
Izoh (0)