Pxenyan Koreya Respublikasi hukumatini KXDRdagi vaziyat haqida tuhmatdan iborat targ‘ibot xabarlarini tarqatishda aybladi, deya xabar bermoqda “TASS”. Korealarni tinch yo‘l bilan birlashtirish bo‘yicha qo‘mitada Seulda Koreya Respublikasi Milliy xavfsizlik strategiyasi instituti simpoziumi arafasida tarqatilgan press-relizga e’tibor qaratishdi.
Unda aytilishicha, “Shimolda diktatura siyosati, qo‘rqitish siyosati olib boriladi”. Qo‘mita vakillari ta’kidlashicha, Janubning bunday da’volari “nafaqat KXDR oliy rahbariyati obro‘siga putur yetkazadi, balki Koreyalararo munosabatlarni juda og‘ir ahvolga keltirish maqsadidagi siyosiy asosga ega targ‘ibot ham hisoblanadi”.
“Bunday xatti-harakatlar shundan darak beradiki, Janubiy Koreya hukumati Koreyalararo munosabatlarni muzokaralar yo‘li bilan yaxshilash uchun kuch sarflashni istamaydi”, — deya ta’kidladi qo‘mita vakili.
Nashr eslatishicha, 26-noyabr kuni KXDR va Janubiy Koreya 11-dekabr kuni Keson qo‘shma industrial hududida vazirlar o‘rinbosarlari darajasida muzokaralar o‘tkazishga kelishib olgan edi.
Izoh (0)