Rossiyaning “Krasnodar” klubi Yevropa Ligasi guruh bosqichining 5-turida Dortmundning “Borussiya” jamoasini 1:0 hisobida mag‘lub etdi. Uchrashuvdan so‘ng O‘zbekiston terma jamoasi sardori Odil Ahmedov o‘yin yuzasidan o‘z fikrini bildirdi, deb yozadi “Olamsport”.
“Shubhasiz, bu biz uchun tarixiy g‘alaba. ‘Borussiya’ Germaniyada ‘Bavariya’dan so‘ng ikkinchi o‘rinda turuvchi kuchli jamoa hisoblanadi. O‘yin ikkala jamoa uchun ham muhim edi. Bu yerda pley-off bosqichi yo‘llanmasi bilan birga guruh g‘olibligi uchun kurash kechdi. Aslida Dortmunddagi o‘yinda ham g‘alaba qozonishimiz kerak edi. Bugun ham bor kuchimiz bilan harakat qildik va yakunda haqli g‘alabaga erishdik”, — dedi Ahmedov.
Eslatib o‘tamiz, “Krasnodar” Dortmundning “Borussiya” jamoasini mag‘lub etib, muddatidan avval Yevropa Ligasining pley-off bosqichiga yo‘llanma olgan edi.
Izoh (0)