Qirg‘iziston poytaxti Bishkekda O‘sh viloyatida ro‘y bergan zilziladan jabr chekkanlar uchun gumanitar yordam to‘plash punktlari ochildi. Bu haqda “TASS” xabar bermoqda.
“Bunday punktlar to‘rtta tuman ma’muriyatida ochilgan, ular dam olish kunisiz ishlaydi. Tabiiy ofatdan jabr chekkan odamlar qurilish materiallari, issiq kiyimlar, maktab anjomlari, oziq-ovqat mahsulotlariga ehtiyoj sezmoqda. Ma’lum miqdordagi yordam to‘plangach, ular darrov zilzila sodir bo‘lgan hududlarga jo‘natiladi”, — deya ta’kidlagan Bishkek meriyasi vakillari.
Respublika favqulodda vaziyatlar vazirligi ma’lumotlariga ko‘ra, kuchli yerosti silkinishlari oqibatida 10 ta uy butkul vayron bo‘lgan, 529 ta uy esa yashash uchun yaroqsiz deb topilgan. Qirg‘iziston rasmiylari tabiiy ofat oqibatlarini bartaraf etishda yordam so‘rab, Rossiyaga murojaat etgan.
Eslatib o‘tamiz, so‘nggi kunlarda O‘zbekistonda epitsentri Qirg‘izistonda bo‘lgan bir necha zilzilalar sezildi. Jumladan, 17-noyabr kuni 22:29 da Toshkentda 2,5—3 balli, 20-noyabr kuni 9:46 da esa 2 balli, 21-noyabr kuni 5:16 da 2 balli zilzilalar sezildi.
Izoh (0)