Parijdagi hujumlarga aloqador terrorchilardan biri Niderlandiyada qidirilmoqda — OAV

Fransiya hukumati fikricha, qochib yurgan ikki terrorchining biri Saloh Abdusalom Niderlandiyada ham qidirilmoqda, deb yozadi “Yevropeyskaya Pravda”.

CNN telekanali tergovga yaqin manbalariga tayanib xabar qilishicha, Abdusalom bir necha yillar avval ushbu mamlakatda yashagan.

Biroq Niderlandiya adliya vazirligi matbuot kotibi terrorchi mamlakatda qidirilmayotganini ta’kidladi.

Abdusalomning akasi Muhammadning advokati Natali Galan qayd etishicha, oilasi undan xabar olmagan va teraktlar tashkilotchisi Abdulhamid Abaudning o‘limi uni taslim bo‘lishga ko‘ndirishiga umid qilmoqda.

Parijdagi ketma-ket hujumlarda qatnashgan sakkizinchi terrorchi — Saloh Abdusalom terrorchilar Bataclan teatriga minib kelgan Polo avtomobili egasidir. U Belgiya va Fransiyada qidirilmoqda.

Avvalroq Parijdagi teraktlar tufayli qidiruvga berilgan Saloh Abdusalomning akasi Muhammad Bryusselda ayblov e’lon qilinmay qo‘yib yuborilgani xabar berilgan edi.