GM Uzbekistan avtomobillarining Qozog‘istondagi sotuvi 10 oy yakunlari bo‘yicha 62 foizga pasaydi

GM Uzbekistan qo‘shma korxonasi avtomobillarining Qozog‘istonda sotilishi 2015-yilning o‘n oyi mobaynida 62,19 foizga pasaydi. Bu haqda Qozog‘iston avtobiznesi assotsiatsiyasiga tayanib, UzDaily xabar bermoqda.

Assotsiatsiya ma’lumotlariga ko‘ra, GM Uzbekistan avtomobillarining mamlakatda sotilish hajmi 2014-yilning yanvar—oktabr oylarida 8592 donani tashkil etgan bo‘lsa, joriy yilda bu ko‘rsatkich 3249 tadan iborat bo‘lgan.

Kompaniya oktabr oyidagi sotuv hajmi (664 ta mashina) bo‘yicha Lada (1234), Renault (975) va Chevrolet (697) modellaridan so‘ng to‘rtinchi o‘rinda qayd etildi.

10 oy yakunlariga ko‘ra esa, GM Uzbekistan bu ko‘rsatkich bo‘yicha Qozog‘istonda to‘qqizinchi o‘rinni egallagan.