Internetda Fransiya prezidenti Fransua Ollandga Parijda yuz bergan terrorchilik harakatlari haqida axborot berilayotgan vaziyat aks etgan fotosuratlar paydo bo‘ldi. Bu haqda “RBK” xabar berdi.
Bu vaqtda Fransiya prezidenti Parijning shimoliy chekkasidagi Sen-Deni tumanida joylashgan “Stad de Frans” stadionida futbol bo‘yicha Fransiya va Germaniya terma jamoalari o‘rtasidagi uchrashuvni tomosha qilayotgan edi — mazkur stadion yaqinida ham portlashlar yuz bergan.
Ollandga Parijdagi teraktlar ketma-ketligi haqida axborot berilayotgani haqidagi fotosuratlarni Britaniyaning The Daily Mail nashri chop etdi. Bu vaqtda stadionda, Ollanddan tashqari, Fransiya tashqi ishlar vaziri Loran Fabius hamda uning germaniyalik hamkasbi Frank-Valter Shtaynmayer ham bor edi.
Stadion yaqinida amalga oshirilgan portlashlardan biri shu qadar kuchli ediki, uning ovozi stadionda ham eshitildi — mahalliy vaqt bilan taxminan 21:17 da yuz bergan ushbu holat teletranslyatsiyalarga muhrlanib qolgan.
Avvalroq Fransiya prezidenti va boshqa yuqori martabali amaldorlar zudlik bilan xavfsiz joyga ko‘chirilgani haqida xabar berilgan edi. Biroq, boshqa bir fotosuratda Olland stadionning xavfsizlik xizmati xonasida telefonda suhbatlashayotgani, bu vaqtda soat 21:36 ekanligi aks etgan.
- Voqea: Parijdagi teraktlar
Izoh (0)