Putin ma’muriyati rahbari Sergey Ivanov razvedkadagi ishi va prezident bilan xonadosh bo‘lgani haqida gapirib berdi

Rossiya prezidenti ma’muriyati rahbari Sergey Ivanov avvalroq maxsus xizmatlarda ishlab, odamlarni yaxshi bilib olish va tez reaksiya ko‘rsatishga o‘rganganini tan oldi, deb yozadi “TASS”.

Agentlikka bergan intervyusida u xizmat paytida Vladimir Putin bilan xonadosh bo‘lgani, josuslikka ishqibozlik va boshqa tafsilotlar haqida gapirib berdi.

“Men siyosiy razvedka bilan shug‘ullanardim va asosan ‘dala’da ishlardim. Bunda sherigingizga ko‘r-ko‘rona ishonishga to‘g‘ri keladi, chunki qayta tekshirib ko‘rish imkoni bo‘lmasdi. O‘zingiznikilardan shubha qila olmaysiz, bu yanada xavfliroq. Josuslikka mukkasidan ketish va xiyonatdan qo‘rqish irodani sindiradi va ishga xalal beradi. Odamlarni yaxshi bilib olib, kimga suyanayotganingizni bilish esa boshqa gap”, — dedi Ivanov.

Shuningdek, razvedkada ishlagan vaqtlarini yodga olar ekan, Ivanov Davlat xavfsizlik qo‘mitasi (KGB)ning Leningrad boshqarmasida Putin bilan bitta xonada ishlaganini aytib o‘tdi.