Qatar poytaxti Doha shahrida davom etayotgan boks bo‘yicha kattalar o‘rtasidagi jahon chempionatining to‘rtinchi kungi bahslaridan so‘ng yana uch nafar o‘zbekistonlik charm qo‘lqop ustasi chorak final yo‘llanmasini qo‘lga kiritdi. Kecha, 9-oktabr kuni O‘zbekiston terma jamoasi a’zolaridan 4 nafari o‘z janglarida ringga ko‘tarildi, deb xabar beradi “Olamsport”.
Terma jamoaning eng tajribali bokschisi 81 kg vazn toifasidagi Elshod Rasulov o‘zining ikkinchi jangini turkiyalik Sem Karlidagga qarshi o‘tkazdi va raqibini 3:0 hisobida mag‘lub etdi. Bugun, 10-oktabr kuni Rasulov ushbu vazn toifasining birinchi raqamli bokschisi qozog‘istonlik Adilbek Niyazimbetovga qarshi ringga ko‘tariladi.
60 kg vazndagi o‘zbekistonlik Elnur Abduraimov ham ikkinchi jangida zafar quchdi. U Yangi Zelandiya bokschisi Chad Milnesdan 3:0 hisobida ustun keldi. Abduraimovning chorak finaldagi raqibi mo‘g‘ulistonlik bokschi bo‘ladi.
Eng og‘ir +91 kg vazn toifasida Bahodir Jalolov ajoyib g‘alabani qo‘lga kiritdi. U o‘z vaznida uchinchi raqam ostida tasniflangan kubalik Lener Peroga qarshi jang o‘tkazdi va raqibini 2:1 hisobida mag‘lubiyatga uchratdi. Endi Bahodir iordaniyalik bokschi bilan jang o‘tkazadi.
Afsuski, 52 kg vazndagi Shahobiddin Zoirov xitoylik Jian Gan Xuga qarshi ringga ko‘tarilib, raqibiga imkoniyatni boy berib qo‘ydi. Shu tariqa, yetti nafar o‘zbekistonlik bokschi chorak finalda jahon chempionati medallari uchun kurashni davom ettiradi.
Izoh (0)