Jahonning eng yopiq davlatlaridan biri hisoblangan Shimoliy Koreyaga hukmron Mehnat partiyasining 70 yilligi bilan bog‘liq tantanalar sabab xorijiy jurnalistlar taklif etildi. Bu haqda “Korrespondent.net” xabar bermoqda.
Chet ellik jurnalistlarga avvallari xorij fuqarolaridan yashirilgan joylarni ham suratga olishga ruxsat berildi. Xususan, Reuters agentligi jurnalistlari Pxenyandagi metro bekatlari fotosuratlarini e’lon qildi.
Avvalroq Shimoliy Koreya hukmron partiya tashkil etilganining 70 yilligi bilan bog‘liq kelasi hafta bo‘ladigan tantanalarni dabdabali tarzda o‘tkazish uchun zo‘r berib mablag‘ qidirayotgani haqida xabarlar paydo bo‘lgandi.
Jumladan, mamlakat hukumati aholiga murojaat qilib, bayramni tashkil etish uchun ko‘proq pul xayriya qilishga chaqirgan. Tahlilchilarning fikricha, Shimoliy Koreya bayram bilan bir qatorda yangi qurollarni ham sinovdan o‘tkazishi mumkin.