Estoniyada 22-sentabr kuni AQSh harbiy-havo kuchlari ishtirokida harbiy mashg‘ulotlar boshlanadi. Bu haqda Estoniya harbiy-havo kuchlari qo‘mondoni Yaak Tarien ma’lum qildi, deya xabar bermoqda “Yevropeyskaya pravda”.
“Estoniya va AQSh harbiy-havo kuchlarining qo‘shma mashg‘ulotlari Atlantic Resolve nomi bilan tanilgan ko‘lami nisbatan katta bo‘lgan dastur doirasida bo‘lib o‘tadi. AQSh tomonidan o‘tgan yili boshlangan mazkur operatsiya NATOning sharqiy qanotidagi mamlakatlar, xususan, Estoniyada alyansning harbiy ishtirokini oshirishga qaratilgan”, — dedi Yaak Tarien.
Uning so‘zlariga ko‘ra, Estoniya va AQSh harbiy-havo kuchlari 2015-yil hisobidan uchinchi qo‘shma mashg‘ulotlarni o‘tkazmoqda. Mart—aprel oylarida Estoniya osmoni uzra AQShning F-16 qiruvchi samolyotlari parvoz qilgan bo‘lsa, avgust—sentabrda A-10 shturmchilari sinovdan o‘tdi.
Markaziy poligondagi nishonlarni urish uchun mudofaa kuchlari shovqini uncha kuchli bo‘lmagan, og‘irligi 25 funtga teng o‘quv bombalari va o‘quv qurol-aslahalaridan foydalanadi. Qayd etish joiz, 21-sentabr kuni o‘quv mashg‘ulotlarida qatnashish uchun AQShdan 10 ta A-10 shturmchi samolyoti olib kelingan.
Izoh (0)