AQShda kurash bo‘yicha rossiyalik chempionni taqdirlashda madhiya adashtirib yuborildi

Las-Vegasdagi kurash bo‘yicha jahon chempionati tashkilotchilari 75 kilogramm vaznda g‘olib bo‘lgan rossiyalik kurashchi Roman Vlasovni taqdirlash vaqtida Rossiyaning birinchi madhiyasi – Mixail Glinkaning “Vatanparvarlik qo‘shig‘i”ni qo‘yib yubordi. Bu haqda Rossiyaning kurash bo‘yicha federatsiyasi sayti xabar beradi.

“Men dastlab qaysi madhiya yangrayotganligiga ahamiyat bermadim. Biroz vaqt o‘tib, bu bizning madhiya emasligini tushundim. Begona madhiya tugagandan so‘ng, Rossiya madhiyasi yangramaguncha supadan tushmasligimni ma’lum qildim! Aynan shu daqiqa uchun biz yil davomida mehnat qilamiz”, — deydi Vlasov.

Natijada tashkilotchilar o‘z xatosini to‘g‘riladi.