Janubiy Koreya Pxenyanga nisbatan avvalroq joriy etilgan sanksiyalarni bekor qilish masalasini KXDR bilan muhokama qilishga tayyor. Bu haqda, “TASS” xabariga ko‘ra, 26-avgust kuni Janubiy Koreyaning mamlakatni birlashtirish ishlari bo‘yicha vazirligi vakili Chjon Yun Xi ma’lum qildi.
“Agar hukumat darajasida muloqot tashkil etilsa, KXDR vakillari tomonidan sanksiyalarni bekor qilish masalasi ko‘tarilishi mumkin, ular bundan manfaatdor. O‘ylashimcha, bu muammoni muzokaralar yo‘li bilan to‘la hal qilish mumkin”, — dedi Chjon Yun Xi.
25-avgust, seshanba kuni ikki koreys davlati so‘nggi bir necha haftadan beri davom etayotgan harbiy qarama-qarshilikni to‘xtatib, o‘zaro aloqalarni yaxshilash ustida ishlash, xususan, Koreya urushi natijasida ajralib ketgan oilalarning uchrashuvlarini qayta tashkil etishga kelishib oldi.
Janubiy Koreya va KXDR o‘rtasidagi hukumat darajasidagi muloqotlar yaqin vaqt ichida Seulda yoki Pxenyanda boshlanishi kutilmoqda.
Eslatib o‘tamiz, ikki Koreya davlat o‘rtasidagi o‘zaro loyihalarning qariyb barchasi 2010-yili to‘xtatib qo‘yilgandi. Bunga Janubiy Koreyaning “Chxonan” korveti cho‘kib ketgani va natijada 46 nafar dengizchi halok bo‘lgani sabab qilib ko‘rsatilgandi. Seulning fikricha, mazkur hodisa uchun aynan Pxenyan javobgar.
Izoh (0)