Yaponiya bosh vaziri: Seul va Pxenyan o‘rtasidagi bitim keskinlikni yumshatish imkonini beradi

Janubiy Koreya va KXDR o‘rtasida har ikkala tomon vakillari ishtirokidagi muzokaralarning ikkinchi davrasi yakunlari bo‘yicha erishilgan kelishuv Koreya yarim orolidagi tanglikni yumshatishga yordam beradi. Bu haqda Yaponiya bosh vaziri Sindzo Abe aytib o‘tdi, deb yozadi “TASS”.

“Biz Janub va Shimol o‘rtasida erishilgan bitimni ma’qullaymiz. KXDR provakatsion xatti-harakatlardan tiyiladi, kelishuv esa mintaqada keskinlikni yumshatishda, shuningdek, qolgan masalalarni hal qilishda yordam beradi, deb umid qilamiz”, — dedi u.

Yaponiya tashqi ishlar vaziri Fumio Kisida, o‘z navbatida, Tokio ushbu vaziyat yuzasidan Seul va Vashington bilan jips aloqada ekanligini ta’kidladi.

KXDR va Janubiy Koreya taxminan 34 soat davom etgan muzokaralarning ikkinchi davrasida kelishuvga erishdi. Unga ko‘ra, Seul radiokarnaylar orqali KXDRga qarshi targ‘ibot eshittirishlarini to‘xtatadi. Pxenyan, o‘z navbatida, chegara yaqinida janubiy koreyalik askarlarning minadan portlashi yuzasidan kechirim so‘radi.