Qozog‘istonda depozitlar bo‘yicha kurs farqini kompensatsiya qilish mexanizmi ishlab chiqiladi
Qozog‘iston Milliy banki va Qozog‘iston depozitlarni kafolatlash jamg‘armasi aholining tengedagi muddatli depozitlari bo‘yicha kurs farqidagi kompensatsiyani qoplab berish mexanizmini ishlab chiqish bo‘yicha ishchi guruh tuzdi. Bu haqda “RIA Novosti” xabar bermoqda.
20-avgust, payshanba kunidan boshlab Qozog‘iston tengening erkin almashinuvchi kursiga asoslangan yangi pul-kredit siyosatini amalga oshirishga kirishdi va valyuta koridorini bekor qildi. Qozog‘iston fond birjasi (KASE)da 19-avgust, chorshanba kuni dollar kursi 188,38 tengega teng bo‘lgan bo‘lsa, 20-avgust tongida 255,26 tengegacha ko‘tarildi. Prezident Nursulton Nazarboyevning so‘zlariga ko‘ra, mamlakat iqtisodiyotining raqobatbardoshligini qayta tiklash va zaxiralarni saqlab qolish uchun shundan boshqa yo‘l qolmagan.
Yangi tashkil etilgan ishchi guruhdan Milliy bank, ikkinchi darajadagi banklar, Qozog‘iston moliyachilar uyushmasi va Qozog‘iston depozitlarni kafolatlash jamg‘armasi vakillari o‘rin olgan. Qayd etishlaricha, 2015-yilning 18-avgustiga qadar hisobida ko‘pi bilan 1 million tengegacha qolgan jismoniy shaxslarning muddatli depozitlari, mazkur depozit mablag‘lari keyingi bir yil davomida bankning maxsus hisob raqamida qolishi sharti bilan, kompensatsiya qilib beriladi.
Avvalroq, Qozog‘iston prezidenti Nursulton Nazarboyev mazkur chora 1,7 million nafar qozog‘istonlikni qo‘llab-quvvatlashga yordam berishini ta’kidlagandi. Qayd etish joiz, bu mamlakatdagi barcha depozitorlarning 86 foizini tashkil etadi.
