Belarus prezidenti saylovida qatnashuvchi nomzodlar soni besh nafargacha kamaydi

Belarus prezidenti saylovida besh nomzod qatnashadi. Bu haqda “Novaya gazeta” xabar bermoqda.

Dastlab prezident o‘rni uchun sakkiz kishi da’vogarlik qilayotgandi, biroq saylovda qatnashish uchun zarur miqdorda imzo to‘plashning uddasidan faqat besh kishi chiqa oldi.

Xabar berishlaricha, amaldagi prezident Aleksandr Lukashenko foydasiga 1,7 million imzo yig‘ilgan, Belarus liberal-demokratik partiyasi raisi Sergey Gaydukevich 140 ming, iqtisodchi Viktor Tereshchenko esa 130 ming imzoni tekshiruvga taqdim etgan.

Saylovoldi poygasida, shuningdek, Belarus kazaklarining oliy atamani Nikolay Ulaxovich va “Haqiqatni so‘zla” kampaniyasi faoli Tatyana Korotkevich ham ishtirok etadi.

Birlashgan fuqarolik partiyasi raisi Anatoliy Lebedko, “Adolatli dunyo” Belarus so‘l partiyasi yetakchisi Sergey Kalyakin, shuningdek, prezidentlikka o‘z nomzodini qo‘ygan vaqtincha ishsiz Janna Romanovskaya zarur miqdorda imzo to‘play olmagan.

Amaldagi prezidenti Aleksandr Lukashenkoning vakolat muddati 2016-yil 21-yanvar kuni yakuniga yetadi. Yangi prezident saylovi esa 2015-yil 11-oktabr kuni o‘tkaziladi.