Mexikoda inson bosh suyaklaridan tiklangan devor topildi

Arxeologlar Mexikoning tarixiy markazida atsteklar imperiyasi davriga tegishli inson bosh suyaklaridan tiklangan devor topdi. Bu haqda Meksika arxeologiya va tarix milliy insitituti saytida xabar joylashtirilgan, deya ma’lum qildi “Korrespondent.net”.

Balandligi 24 metrdan ziyod bo‘lgan devor Gvatemala ko‘chasida, ikki metr chuqurlikda topilgan. Uning markaziy qismidagi doira shaklida joylashtirilgan bosh suyaklaridan tashqari, qurilish materiali sifatida ohak, qum va shag‘al ham ishlatilgan.

Olimlarning ta’kidlashicha, devor XV asr oxiri—XVI asr boshlarida barpo etilgan, undagi suyaklar esa boshi tanasidan judo etilgan atsteklar dushmanlariga tegishli bo‘lgan.