Itiga yaratgan qulaylik uchun xitoylik ayolga jarima jazosi xavf solmoqda

Xitoyning Chunsin shahrida yashovchi ayolga avtobus tirbandligida itini o‘rindiqqa o‘tqizib, uni boshqa yo‘lovchilardan qo‘riqlaganligi uchun 150 dollarga yaqin jarima jazosi xavf solmoqda. Bu haqda South China Morning Post xabar bermoqda.

Bu holatdan g‘azablangan guvohlarning so‘zlariga qaraganda, ayol itini qo‘liga olishdan bosh tortib, uning o‘rniga boshqa yo‘lovchilarning o‘tirishiga yo‘l qo‘ymagan. Ayol o‘zining bu harakatini sevimli uy hayvoni uchun alohida chipta olganligi bilan asoslagan.

Shaharda uy hayvonlarini jamoat transportida olib yurish taqiqlangan. Avtobus qarashli bo‘lgan transport kompaniyasi vakilining ta’kidlashicha, ayol itini sumkasida olib o‘tganligi sababli avtobus haydovchisi uni payqamagan.