Gretsiyaga bir hafta ichida qariyb 21 ming muhojir keldi. “Eurointegration.com.ua”ning qayd etishicha, bu ko‘rsatkich o‘tgan yili mamlakatga kelgan muhojirlar jami sonining deyarli yarmiga teng.
“So‘nggi bir necha haftadan buyon muhojirlarning kelishi tezligi tinimsiz o‘smoqda. Birgina iyul oyida Gretsiyaga 50,2 ming muhojir keldi, bu butun bir o‘tgan yilgi ko‘rsatkichdan (43,5 ming) ko‘p. 8—14-avgust oralig‘ida Gretsiyaga dengiz orqali 20,8 ming kishi keldi, bu 2014-yilgi miqdorning qariyb yarmi”, — dedi BMTning Inson huquqlari bo‘yicha oliy komissari boshqarmasi rahbari Uilyam Shpindler.
O‘tgan hafta Gretsiyaga kelganlarning aksariyatini — qariyb 17 ming kishini suriyaliklar, 2,8 ming nafarini afg‘onlar va 582 nafarini iroqliklar tashkil etadi. Ularning aksariyati Gretsiyaga, katta ehtimol bilan, qochoq maqomini olish maqsadida suzib kelgan. BMTning so‘nggi ma’lumotlariga ko‘ra, 2015-yil boshidan buyon Gretsiyaga kelgan muhojirlar soni 160 mingdan oshib ketgan.
Joriy yilda O‘rtayer dengizini kechib o‘tgan muhojirlarning umumiy soni 264,5 mingga yaqin bo‘lib, ularning bir qismi, Gretsiyadan tashqari, Italiyaga (104 ming muhojir), Ispaniyaga (1,9 ming muhojir) va Maltaga (94 nafar muhojir) yo‘l olgan.
Izoh (0)