18-avgust kuni Nodir Normatovning fotoko‘rgazmasi va “Chingiz Ahmarov” filmining taqdimoti bo‘lib o‘tadi

2015-yilning 18-avgust kuni soat 15:00 da O‘zbekiston Badiiy Akademiyasi Ikuo Xirayama Xalqaro madaniyat karvon saroyida yozuvchi, san’atshunos va fotorassom Nodir Normatovning “Mehr qolur, muhabbat qolur...” nomli fotoko‘rgazmasi va muallif ssenariysi asosida suratga olingan “Chingiz Ahmarov” hujjatli filmi taqdimoti bo‘lib o‘tadi, deb xabar beradi “Caravanserai.uz”.

Fotoko‘rgazmaning bosh mavzusi – O‘zbekistonning piru badavlat otaxonlariyu onaxonlaridir. Muallif so‘nggi o‘n yil ichida respublikaning turli viloyatlarida, jumladan, Nukus, Termiz, Namangan, Qarshi, Shahrisabz, Andijon, Farg‘ona, Marg‘ilon, Baxmal, Jizzax, Sirdaryo, Boysun kabi shaharlari va olis, chekka qishloqlarida bo‘lib, juda ko‘plab fotosuratlar olgan.

“Chingiz Ahmarov” hujjatli filmi N.Po‘latova rejissorligida O‘zbekiston ilmiy-ommabop va hujjatli filmlar kinostudiyasida suratga olingan. Ushbu film ustoz san’atkorning hayoti va ijodiy yo‘li, uning devoriy va mahobatli suratlari, ulkan merosi haqida qiziqarli dalillar va hujjatlar asosida hikoya qiladi. Filmda rassomning hayoti davrida olingan kinokadrlardan mahorat bilan foydalanilgan.