Rossiya prezidenti vakili Oliy suddan mamlakat Qurolli kuchlarining tinchlik davridagi yo‘qotishlari haqidagi axborotning maxfiylashtirilishi ustidan berilgan shikoyatni rad etishni so‘radi. Bu haqda “Gazeta.ru” xabar bermoqda.
Avvalroq bir guruh advokatlar va jurnalistlar xuddi shunday shikoyat bilan Oliy sudga murojaat qilgandi, ularning fikricha, mazkur axborotning maxfiylashtirilishi fuqarolarning inson huquqlari buzilishi haqidagi ma’lumotlarni olish huquqini cheklaydi.
“Mazkur shikoyat qanoatlantirilishi kerak emas, shikoyatchilarning barcha ta’kidlari shov-shuv uchun va dalillar bilan asoslanmagan”, — dedi Putinning vakili.
Uning so‘zlariga ko‘ra, taklif qilinayotgan tuzatish amaldagi qonunchilikka zid emas va Rossiya Konstitutsiyasiga muvofiqdir. Bundan tashqari, vakilning aniqlik kiritishicha, bu kabi axborotning oshkor etilishi mamlakat xavfsizligiga tahdid uyg‘otishi mumkin.
Avvalroq harbiylarning tinchlik davridagi yo‘qotishlarini maxfiylashtirish tashabbusi Rossiya bosh vaziri Dmitriy Medvedevdan chiqqani ma’lum bo‘lgandi.
Izoh (0)