“Jizzax” maxsus industrial zonasida 9-avgust kuni yorug‘lik diodli tejamkor elektr uskunalar ishlab chiqarishga ixtisoslashgan “Yorqin chiroqlar” qo‘shma korxonasining ochilish marosimi bo‘lib o‘tdi. Bu haqda “Gazeta.uz” xabar bermoqda.
“O‘zbekenergo” kompaniyasi xabariga ko‘ra, qo‘shma korxona “O‘zbekenergo” tizimiga kiruvchi “Jizzax hududiy elektr tarmoqlari korxonasi” va Janubiy Koreyaning OWELL kompaniyasi o‘rtasida tashkil etilgan.
Loyihaning umumiy qiymati 2,5 million dollarga teng. Kompaniya yiliga 2,5 million donagacha yorug‘lik diodli tejamkor elektr uskunalar, xususan, 120 ming dona 100 vatt, 500 ming 32 vatt va 1,88 million dona 7 vatt quvvatli chiroqlar ishlab chiqarishni rejalashtirmoqda.
Qo‘shma korxona Janubiy Koreya prezidenti Pak Kin Xening 2014-yil 17-iyun kuni O‘zbekistonga amalga oshirgan tashrifi chog‘ida “O‘zbekenergo” va OWELL o‘rtasida imzolangan hamkorlik memorandumiga muvofiq tashkil etilgan.
O‘zA axborotiga ko‘ra, korxona 2015-yilning uchinchi choragida 21 ming donadan ziyod tejamkor lampa ishlab chiqarishni rejalashtirgan.
Jizzax hududiy elektr tarmoqlari korxonasi rahbari o‘rinbosari Xayrulla Otaboyevning so‘zlariga ko‘ra, hozirgi kunda O‘zbekistonda foydalanilayotgan o‘rtacha 60 vattli 43 million dona oddiy cho‘g‘lanma lampaga 6,5 milliard kilovatt soat elektr energiyasi sarflanadi.
Agar ular yorug‘lik diodli lampalarga almashtirilsa, energiya sarfi 5 milliard kilovatt soatni tashkil etadi. Bu ushbu energiyani ishlab chiqarishga sarflanadigan 1,6 milliard kub metr tabiiy gaz yoki 5 million tonna ko‘mir yoqilg‘isini tejash demakdir.
Izoh (0)