O‘zbekistonda tashrif bilan bo‘lib turgan Janubiy Koreyadagi Inha universitetining yangi prezidenti Sunya Choy xonim 12-avgust kuni Toshkentdagi Inha universiteti rektori Sherzod Shermatov bilan uchrashdi. Bu haqda “Infocom.uz” xabar bermoqda.
Uchrashuv davomida o‘zaro hamkorlikni bundan keyin ham rivojlantirish, mahalliy professor-o‘qituvchilar tarkibi malakasini oshirish bo‘yicha hujjatlar imzolandi, shuningdek, Toshkentdagi Inha universiteti kutubxonasi uchun yangi kitoblar sovg‘a qilindi.
Sunya Choy boshliq delegatsiya universitet binosida ekskursiya qilib bo‘lganidan so‘ng oliygohning yangi talabalari bilan uchrashdi va kirish imtihonlari vaqtida eng yuqori ball to‘plagan — Ulug‘bek Samig‘jonov, Jahongir Ne’matov, Temur Qodirov, Abdurahmon Qodirov, Jaloliddin Shofiyev, Elbek Hoshimjonov, Malika Anvarjonova, Shohruh Shomahmudov, Sherzod Niyozov, Javohir Jo‘raxonovga grant sertifikatlarini topshirdi.
Grant sohibi bo‘lgan 10 talabaning uch nafari kirish imtihonlari yakuniga ko‘ra eng yuqori ballni (100%) qo‘lga kiritganini alohida qayd etib o‘tish joiz. Ma’lumot uchun, 14-avgust kuni Aloqa tarixi muzeyida OAV vakillari uchun Inha universiteti prezidenti Sunya Choy ishtirokida matbuot anjumani bo‘lib o‘tadi.
Izoh (0)