Misrning o‘lim jazosiga mahkum etilgan sobiq prezidenti Muhammad Mursiy qamoqxonadagi oziq-ovqat ta’minoti sifatidan norozilik bildirdi va tibbiy ko‘rikdan o‘tkazishlarini talab qildi. Bu haqda Reuters agentligi xabar bermoqda.
Qandli diabetdan aziyat chekayotgan Mursiy unga sifatsiz taomlarni tortiq qilayotganliklarini ma’lum qilib, “o‘zi uchun xavfli ekanligini his qilgani sabab” qamoqxona taomlarini tanovul qilishdan o‘zini tiyayotganini qayd etib o‘tdi.
Ayni vaqtda, sobiq prezidentning ta’kidlashicha, qamoqxona ma’muriyati Mursiy uchun tashqaridan olib kelinayotgan taomlarni kiritmayapti.
2011-yil yanvarida yuz bergan qamoqxonadan ommaviy qochish ishini ko‘rib chiqqan Misr sudi 16-may kuni Mursiyni o‘limga hukm qilgandi. U, shuningdek, Qatarga maxfiy ma’lumotlarni taqdim etganlikda ham ayblanmoqda. Mazkur jinoyat ishi bo‘yicha navbatdagi sud majlisi 9-avgust kuni bo‘lib o‘tadi.
Izoh (0)