Ekipajning besh a’zosidan to‘rt nafari alkogol testidan o‘ta olmagani sabab, airBaltic aviakompaniyasining Oslodan Krit oroliga parvoz qiluvchi reysi qariyb besh soatga kechikdi. Bu haqda Meduza xabar bermoqda.
Uchuvchi, ikkinchi uchuvchi va ikki styuardessa politsiya hamrohligida mahalliy kasalxonalardan biriga olib kelingan va qon tarkibida alkogol miqdorini aniqlash bo‘yicha testdan o‘tkazilgan. Test natijalari hozircha ma’lum qilinmayapti.
Oslo politsiyasi vakili Edit Ek Serensenning ma’lum qilishicha, huquqni muhofaza qilish organlari airBaltic ekipaji alkogolli ichimlik ta’sirida bo‘lishi mumkinligi haqida ismi oshkor etilmagan (anonim) manbadan axborot olgan.
Agar samolyot ekipaji mast holatda reysni amalga oshirish niyatida bo‘lgani haqidagi gumonlar tasdiqlansa, uchuvchilar va styuardessalar ikki yilgacha ozodlikdan mahrum etilishi mumkin.
airBaltic aviakompaniyasi murojaat bilan chiqish qilib, mazkur hodisa yuzasidan izchil surishtiruv o‘tkazishga va’da bergan va reys kechikkani uchun yo‘lovchilardan kechirim so‘ragan. Xizmat tekshiruvi davomida alkogol testidan o‘ta olmagan ekipaj a’zolari ishdan vaqtincha chetlatiladi.
Mahalliy OAV ma’lumotlariga ko‘ra, besh soatga kechikkan samolyotda 109 yo‘lovchi Oslodan Kritga uchishi kerak edi.
Izoh (0)