Denis Istomin Gshtaddagi turnirning juftliklar bahsida yarim finalga chiqdi

Shveysariyaning Gshtad shahrida tennis bo‘yicha o‘tkazilayotgan Suisse Open Gstaad an’anaviy xalqaro turnirida O‘zbekistonning birinchi raqamli tennischisi Denis Istomin juftlik bahslarida yarim finalga chiqdi. Bu haqda O‘zbekiston Milliy olimpiya qo‘mitasining matbuot xizmati xabar bermoqda.

Belaruslik sherigi Aleksandr Buriy bilan bahslarga kirishgan Denis Istomin chorak finalda Tomash Bednarek (Polsha) / Ramiz Junaid (Avstraliya) duetini 6:3, 6:4 hisobida mag‘lub etdi.

Endi Denis Istomin / Aleksandr Buriy juftligi yarim finalda avstriyalik duet Yulian Noul va Filipp Osvaldga qarshi kortga tushadi. Ikkinchi yarim finalda esa Marsel Granolyers (Ispaniya) / Mark Lopes (Ispaniya) – Oliver Marax (Avstriya) / Aysam-ul-Haq Kureshi (Pokiston) o‘zaro kuch sinashadi.

Eslatib o‘tamiz, Istomin / Buriy juftligi birinchi davrada Mariush Firstenberg (Polsha) / Santyago Gonsales (Meksika) duetidan 6:3, 7:6 hisobida ustun kelgan edi.

Denis 30-iyul kuni Gshtad turnirining yakkalik bahsidagi ishtirokini yakunlagandi.