Venesuela neft bahosining pasayishi oqibatida shu yil boshidan beri 13—15 milliard dollar boy berdi. Bu haqda “Nasyonal” nashriga asoslanib, “TASS” xabar bermoqda.
O‘tgan yil yanvaridan iyunigacha Janubiy Amerikadagi bu davlatdan olinadigan neftning bir barreli o‘rtacha 98 dollar turardi, bu yil yanvaridan mayigacha esa bu ko‘rsatkich 49% arzonlab, 49,7 dollarga tushib qoldi. “Narxlar tiklanmadi, bu amalga oshishiga umid qilish ham mushkul, —deydi iqtisodchi Luis Oliveros. — Kelgusida ham bu pasayish davom etsa, yil oxiriga borib mamlakat byudjeti 24 milliard dollar yo‘qotadi”.
Keyingi bir necha yil davomida Venesuela og‘ir iqtisodiy bo‘hronni boshidan kechiryapti, ko‘pgina mahsulotlar taqchilligi hamda hatto Lotin Amerikasi o‘lchovlari bilan qaraganda ham o‘ta yuqori bo‘lgan jinoyatchilik vaziyatni yanada chigallashtirmoqda. Taxminlarga ko‘ra, bu yil mamlakat yalpi ichki mahsuloti 5,4 foizga kamayadi, pul qadrsizlanishi darajasi esa 90 foizdan oshadi.
Izoh (0)