OAV: Meksika janubida qiynoqqa solish alomatlari bo‘lgan 7 kishining jasadi topildi

Meksika janubidagi Gerrero shtatida qiynoqqa solish belgilari bo‘lgan yetti nafar erkak kishining jasadi topildi, deb xabar beradi “RIA Novosti”.

Hodisa guvohlarining ma’lum qilishicha, yarim tunda Zitlala ko‘chalaridan birida qurollangan noma’lum shaxslar avtomobildan jasadlarni tushirib ketgan. Ular 22-iyul, chorshanba kuni topilgan, biroq noqulay ob-havo sharoiti tufayli huquqni muhofaza qiluvchi organ xodimlari payshanba kuni hodisani tekshirishga kirishdi.

Mahalliy OAVning ma’lum qilishicha, barcha jasadlarda qiynoqqa solish alomatlari, shuningdek o‘q yaralari bo‘lgan. Ulardan birining boshi tanasidan judo qilingan.