Yadroviy kelishuvning amalga oshirilishi va sanksiyalarning bekor qilinishi Eronning mintaqadagi nufuzini oshiradi, biroq Eronga qo‘shni mamlakatlarga zarar yetkazmaydi. Bu haqda, “TASS” xabariga ko‘ra, Eron prezidenti Hasan Ruhoniy ma’lum qilgan.
“Agar Eron kuchli bo‘lsa, boshqa mamlakatlarning ichki ishlariga aralashadi, deb o‘ylash xato. Boshqa mamlakatlarning ichki ishlariga aralashish nomaqbul ish va har bir xalq o‘z taqdirini o‘zi belgilashi kerakligiga ishonchimiz komil. Biroq, biz jafokashlarni himoya qilamiz hamda mintaqa va xalqaro miqyosda butun kuchimizni safarbar qilgan holda terrorchilik tahdidiga qarshi kurashamiz”, — dedi Ruhoniy.
Eron prezidentining qayd etishicha, Birgalikdagi harakatlar rejasiga xalqaro qonun maqomini bergan “ko‘lami jihatidan qiyosi yo‘q rezolyutsiya”ning qabul qilinishi bilan Eron xalqining tinchlik yo‘lida yadroviy tadqiqotlar olib borish huquqi tugal tan olindi va “adolatsiz sanksiyalar tartibi vayron bo‘ldi”.
Eron rahbarining qayd etishicha, yadroviy kelishuv qaysidir bir uchinchi davlatga qarshi qaratilgan emas. “Ba’zilar yadroviy kelishuv Eron atom bombasini qo‘lga kiritishi mumkin bo‘lgan muddatni bir yilgacha uzaytirdi, deb hisoblamoqda. Bunday gaplarni eshitish kulguli, chunki Eron hech qachon ommaviy qirg‘in quroliga ega bo‘lmagan, chunki bunday qurolning Eronda bo‘lishi Islom inqilobi ma’naviy yetakchisi tomonidan chiqarilgan fatvoga ziddir”, — dedi Ruhoniy.
“20-iyul kuni BMT Xavfsizlik kengashi yadroviy kelishuv bo‘yicha maxsus rezolyutsiya qabul qilish bilan, xalqaro hamjamiyat “Eron Islom Respublikasining tinchlik yo‘lidagi yadroviy tadqiqotlarini ortiq global” tahdid deb hisoblamasligini tan oldi. Bu katta g‘alaba!”, — dedi Eron prezidenti.
Izoh (0)