Osiyo shaxmat federatsiyasi O‘zbekiston Respublikasi Prezidenti Islom Karimovni “Yil kishisi” deb e’lon qildi. Bu haqidagi rasmiy tabrik maktubi O‘zbekiston shaxmat federatsiyasiga kelib tushgan, deb xabar qiladi “Olamsport.com”.
Maktubda yozilishicha, Osiyo shaxmat federatsiyasi tomonidan o‘tkazib kelinayotgan an’anaviy 2nd Annual Asian Chess Excellence Awards mukofotining “Yil kishisi” nominatsiyasi g‘olibi sifatida O‘zbekiston Respublikasi Prezidenti Islom Karimov e’tirof etilgan.
Osiyo shaxmat federatsiyasi prezidenti Shayx Sulton bin Halifa Al Naxyon bu yangilikni rasman e’lon qildi. Xabarga mos tarzda suratlar ham ilova qilinib, unda Shayx Sulton federatsiya bosh kotibi Xisham Al-Toxir bilan birga nominatsiya g‘olibiga taqdim etiladigan mukofotni namoyish qilgan.
Ushbu nominatsiya bo‘yicha mukofot mamlakatda shaxmatga qaratilayotgan e’tibor, bolalar sporti, xususan shaxmatga berilayotgan g‘amho‘rlik, yaratilayotgan sharoitlar va doimiy qo‘llab-quvvatlashni ta’minlayotganlar uchun topshiriladi.
Asian Chess Excellence Awards mukofoti o‘tgan yili ta’sis etilgan bo‘lib, ilk g‘oliblarni taqdirlash marosimi 2014-yilning 25-iyul kuni BAAning Al-Ayn shahrida bo‘lib o‘tgan edi. O‘shanda “Yil kishisi” nominatsiyasida g‘oliblik BAAning Sharja shahri amiri Shayx Muhammad Al Qosimiga nasib etgandi. Qosimi 10 million AQSh dollari evaziga dunyodagi eng katta shaxmat klubini bunyod ettirgandi.
Izoh (0)