Kremniy vodiysining bir qator gigant-kompaniyalari, xususan, Google, HP va Facebook Apple’ning da’volariga qarshi chiqdi va Samsung’ni qo‘llab-quvvatladi — iPhone ishlab chiqaruvchi kompaniya Janubiy Koreya shirkatini patent huquqlarini buzishda ayblab kelayotgan edi. Bu haqda “Hi-tech.mail.ru” xabar bermoqda.
Apple va Samsung o‘rtasidagi patent urushi 2011-yildan beri davom etmoqda. Apple da’volariga ko‘ra, Samsung o‘z smartfonlari uchun iPhone’ning ko‘plab o‘ziga xosliklarini ko‘chirib olgan. Da’vodan iPhone’ning aylana ko‘rinishidagi burchaklari, multitach va barmoq bilan bosish orqali yaqinlashtirish kabi xususiyatlari o‘rin olgan.
Kremniy vodiysi kompaniyalarining fikricha, Apple da’volarining qanoatlantirilishi “mantiqsiz natijalar hamda yangi texnologiyalar va ular uchun ehtiyot qismlarni ishlab chiqish uchun har yili milliardlab dollar sarflayotgan kompaniyalar uchun vayronkor ta’sirga olib kelishi mumkin”.
Kompaniyalar bayonotida qayd etilishicha, zamonaviy texnologiyalar shu qadar murakkab va shu qadar ko‘p ehtiyot qismlardan tashkil topganki, ularning har biri bitta sud tortishuviga sabab bo‘lishi va istalgan kompaniya patent huquqlarini buzishda aybdor deb topilishi, oxir-oqibat, barcha ishlanmalar to‘xtab qolishi mumkin.
Izoh (0)