Xalqaro futbol federatsiyasining sobiq vitse-prezidenti Jeffri Uebb ozodlikka chiqish uchun 10 million dollar miqdoridagi garov pulini o‘z mulklari va rafiqasi Kendra Gembl-Uebbning qimmatbaho taqinchoqlari yordamida to‘lagan, deb xabar qiladi Associated Press.
Kerakli summani to‘plash uchun u Ferrari, Range Rover, Mercedes avtomobillari, 11 ta soat, 10 ta ko‘chmas mulk obyektlarining hujjati, rafiqasining hisobidagi 401 ming dollar hamda bir qancha zargarlik buyumlarini taqdim etgan. Zargarlik buyumlari orasida brilliant ko‘zli nikoh uzugi ham bor edi.
Eslatib o‘tamiz, FIFA vitse-prezidenti Jeffri Uebb 10 million dollar garov puli evaziga ozodlikka chiqqandi. U Bruklindagi federal suddan 32 kilometr nariga uzoqlashmasligi kerak. Uning harakatlarini maxsus elektron qurilma kuzatib boradi. Amaldor unga qo‘yilayotgan ayblarni tan olmadi.
Jeffri Uebb 27-may kuni Syurixda hibsga olingan amaldorlardan biri hisoblanadi. 16-iyul kuni u AQShga ekstraditsiya qilingandi.
Izoh (0)