Tennis bo‘yicha O‘zbekiston terma jamoasi Toshkentda bo‘lib o‘tgan Janubiy Koreyaga qarshi o‘yinda g‘alaba qozondi va Devis Kubogining jahon ligasiga o‘tish turnirida ishtirok etish huquqini qo‘lga kiritdi, deb xabar beradi “Stadion.uz”.
Dastlabki ikki kun natijalariga ko‘ra o‘zbekistonlik tennischilar 2:1 hisobida oldinda borayotgan edi. 19-iyul kuni bo‘lib o‘tgan dastlabki bahsda Denis Istomin koreyaliklarning birinchi raqamli sportchisi Xyong Chungni mag‘lub etdi. Aniqrog‘i, dastlabki setda Denisning qo‘li baland kelgan bo‘lsa (6:1), ikkinchi set boshida raqib tennischisi jarohat bois o‘yinni davom ettira olmadi.
To‘qnashuv taqdiri hal bo‘lgani bois beshinchi o‘yinda O‘zbekiston sharafini Temur Ismoilov himoya qildi. U Janubiy Koreyaning ikkinchi raqamli tennischisi Seong Chang Xongga qarshi o‘yinda 5:7, 6:4, 3:6 hisobida imkoniyatni boy berdi.
Natijada, O‘zbekiston va Janubiy Koreya o‘rtasidagi to‘qnashuv 3:2 hisobida O‘zbekiston foydasiga hal bo‘ldi. Endi O‘zbekiston termasi kuzda jahon ligasiga o‘tish musobaqasida ishtirok etadi. Raqib jamoa nomi keyinroq tashlanadigan qur’ada aniq bo‘ladi.
Izoh (0)