Toshkentdagi “O‘zbekiston” sport majmuasida 18-iyul kuni APB (AIBA Pro Boxing) musobaqasining 60 kilogrammgacha bo‘lgan vazn toifasida birinchi bosqichning ikkinchi uchrashuvlari o‘tkaziladi, deb xabar beradi O‘zbekiston boks federatsiyasi matbuot xizmati.
Musobaqalar O‘zbekiston Boks federatsiyasi tomonidan O‘zbekiston Madaniyat va sport ishlari vazirligi, O‘zbekiston Milliy olimpiya qo‘mitasi va Xalqaro havaskor boks assotsiatsiyasi (AIBA) bilan hamkorlikda tashkil etilmoqda.
18-iyul kuni to‘rtta jang bo‘lib o‘tadi. Rio-de-Janeyrodagi Olimpiada—2016 yo‘llanmasi uchun kechadigan jangda o‘zbekistonlik Xurshid Tojiboyev va rossiyalik Dmitriy Polyanskiy ringga ko‘tariladi.
Eslatib o‘tamiz, 30-may kuni Toshkentda o‘tkazilgan birinchi bosqichning birinchi uchrashuvida Xurshid Tojiboyev irlandiyalik Devid Joysni 3:0 hisobida mag‘lubiyatga uchratgandi.
Qolgan uchta jang reyting o‘rinlari uchun bo‘lib o‘tadi. Irlandiyalik Devid Joys braziliyalik Robson Konseysaoga qarshi, filippinlik Charli Suarez italiyalik Domenik Valentinoga qarshi, germaniyalik Artur Bril beninlik Chita Shafikka qarshi jang qiladi.
Izoh (0)