Meksikalik narkobaron milliarder o‘ta qattiq qo‘riqlanadigan qamoqxonadan qochdi
“Sinaloa” nomli qudratli jinoiy guruh yetakchisi 11-iyul, shanba kechki payt dush qabul qilgani borgan va shundan keyin uni hech kim ko‘rmagan. Qidiruvlar uning qamoqxona hududida emasligini ko‘rsatdi. Hodisadan so‘ng Mexiko yaqinidagi yo‘llarda transport sinchiklab tekshirilyapti, Toluka aeroportidan samolyot uchishi cheklangan. Bu haqda Meksika politsiyasiga tayanib, ABC telekanali ma’lum qildi, deya xabar bermoqda “RBK”.
El Chapo Gusman laqabi bilan tanilgan Xoakin Gusman Loera AQSh adliya vazirligi tomonidan dunyodagi eng qudratli narkobaron sifatida tan olingan, 2009-yildan boshlab Forbes jurnali tuzadigan sayyoraning eng nufuzli 60 kishisi ro‘yxatiga kirar, mol-mulki 1 milliard dollarga baholanardi. Kolumbiyadagi narkokartellar yakson qilingach, aynan El Chapo AQShga yetkaziladigan giyohvandlik moddalarining katta qismini o‘z nazoratiga oldi. Janubi-sharqiy Osiyo va Xitoy jinoyatchilik olami bilan aloqa bog‘lab, u yerlardan sintetik narkotiklar ishlab chiqarish uchun xomashyo keltirishni yo‘lga qo‘ydi.
Gusman politsiya tomonidan ikki bor qamoqqa olingan: 1993-yili Gvatemalada qo‘lga tushganda Meksika sudi 20 yilga ozodlikdan mahrum etgandi. Ammo 2001-yili narkobaron soqchilarning barchasini sotib olib, qamoqdan qochib ketdi. 2014-yil fevralida Tinch okeani sohilidagi mehmonxonada yana hibsga olinib, qochish deyarli ilojsiz hisoblangan va o‘ta qattiq qo‘riqlanadigan qamoqxonaga joylashtirilgandi.
