Mahalliy sinoptiklarning ma’lum qilishicha, “Chan-xom” to‘foni 11-iyul kuni Xitoyning sharqiy qirg‘oqlariga yopiriladi. “Kommersant.ru” xabariga ko‘ra, hozirgi vaqtda to‘fon qirg‘oqdan 145 kilometr uzoqlikda, tabiiy ofat markazi yaqinida shamol tezligi soniyasiga 58 metrni tashkil etmoqda.
Chjetszyan viloyati sohilbo‘yi tumanlarining 960 mingdan ortiq aholisi xavfsiz hududlarga ko‘chirilgan. Mahalliy ma’muriyat viloyat aeroportlarini yopgan, 600 dan ortiq aviareyslarni bekor qilgan. Dengizda yo‘lovchi tashish ishlari to‘xtatilgan, uzoq masofa harakatlanuvchi poyezd va avtobuslar qatnovi vaqtincha cheklangan.
Viloyat sohillari yaqinida dengizda bo‘lgan 30 mingga yaqin kemaga portlarga qaytish haqida ko‘rsatma berilgan. Futszyan va Chjetszyan viloyatlarida eng yuqori xavf darajasi e’lon qilingan. Shuningdek, Shanxayda ham bo‘ron xavfi amalda bo‘ladi.
“Chan-xom” to‘foni joriy hafta Xitoyga yopirilgan ikkinchi tayfun bo‘ladi. 9-iyul, payshanba kuni Xitoy janubiga “Lyanxua” to‘foni yopirilgan, oqibatda 1,6 million kishi jabr ko‘rgandi. Tabiiy ofat 213 million dollar zarar yetkazgani aytilmoqda.
Izoh (0)