O‘zbekiston va Xitoy o‘rtasidagi tovar ayirboshlash hajmi 2014-yilda 4,7 mlrd dollarni tashkil etdi

O‘zbekiston Prezidenti Islom Karimov Shanxay hamkorlik tashkilotining Ufa sammiti doirasida 10-iyul kuni Xitoy Xalq Respublikasi Raisi Si Szinpin bilan uchrashdi. Tomonlar o‘zaro munosabatlarning bugungi holati va uni yanada rivojlantirish istiqbollarini atroflicha muhokama qildi, deb xabar beradi O‘zA.

Islom Karimov keng ko‘lamli O‘zbekiston – Xitoy munosabatlari ikki davlat rahbarlarining do‘stlik va o‘zaro ishonchga asoslangan muloqotlari negizida tobora rivojlanib borayotganini ta’kidladi.

Xitoy bilan iqtisodiyot, transport kommunikatsiyalari, ta’lim kabi qator sohalarda yirik loyihalar amalga oshirilmoqda. O‘rta Osiyo – Xitoy gaz quvuri, Angren – Pop elektrlashtirilgan temir yo‘l liniyasi, Angrenda avtomobil va qishloq xo‘jaligi texnikasi uchun shinalar hamda konveyyer lentasi ishlab chiqarish yo‘lga qo‘yilgani muvaffaqiyatli hamkorlikning yorqin namunalaridir.

Tovar ayirboshlash hajmi so‘nggi 6-yilda 3 karra ortgani e’tiborga molik. 2008-yilda bu ko‘rsatkich 1,5 milliard dollarni tashkil etgan bo‘lsa, 2014-yilda 4,7 milliard dollarga yetdi.

Si Szinpin O‘zbekiston rahbarini joriy yil mart oyida bo‘lib o‘tgan Prezident saylovidagi g‘alabasi bilan yana bir bor tabriklab, O‘zbekiston xalqi Islom Karimov rahbarligida barcha sohalarda yanada katta yutuqlarni qo‘lga kiritishiga ishonch bildirdi.

XXR Raisi Xitoy tomoni O‘zbekistonda tibbiyot, ta’lim va axborot-kommunikatsiya texnologiyalari sohalaridagi islohotlarni qo‘llab-quvvatlash uchun texnik yordam sifatida 350 million yuan miqdorida grant ajratganini ma’lum qildi.

Uchrashuvda ShHT doirasidagi hamkorlik masalalari yuzasidan ham fikr almashildi.