Misrlik Nagib Saviris 35 mln yevro evaziga Euronews kanalining 53 foiz aksiyasini sotib oldi

Media Globe Networks kompaniyasi Euronews kanalining 53 foiz aksiyasini sotib oldi, deb xabar qiladi “Vedomosti”.

Media Globe Networks kompaniyasi Savirislar oilasiga tegishli va Nagib Saviris tomonidan boshqariladi. Saviris Euronews’ga 35 million evro kapital kiritish evaziga kanal boshqaruv paketining 53 foizini qo‘lga kiritdi. Qolgan paketlarga 21 ta milliy telexolding va 3 ta davlat egalik qiladi.

Saviris xalqaro kanalning boshqaruv paketini qo‘lga kiritmoqchi ekanligi joriy yilning may oyida ma’lum bo‘lgandi. O‘shandan keyin Euronews aksionerlari ushbu kelishuvni ma’qulladi.

Euronews kanali 1993-yilda ishga tushirilgan va hozirda 156 ta davlatda namoyish qilinadi. Kanalning yillik byudjeti 75 million yevroga teng.