Moskva politsiyasining maxsus bo‘linmasi o‘nlab chechenistonliklar iftorlik uchun yig‘ilgan restoranda reyd o‘tkazdi. “Echo.msk.ru”ning xabar berishicha, hodisa haqida va uning videoyozuvi Checheniston televideniyesida e’lon qilingan.
Reyd qachon o‘tkazilganiga aniqlik kiritilmagan, biroq kuzatuv kameralari yozuvida 19-iyun sanasini ko‘rish mumkin. Checheniston televideniyesining xabar berishicha, shu kuni “Vesyoliy Babay” restoraniga 50 nafarga yaqin chechenistonlik yig‘ilgan va hech qanday huquqbuzarlik amalga oshirilmagan.
Shu vaqt Moskva politsiyaning maxsus bo‘linmasi restoranga bostirib kirib, hammani yerga yotqizgan, telefonlarni musodara qilgan, cho‘ntaklarni ag‘darib, avtomobil kalitlarini yig‘ib olgan. Advokat Salom Musayevning so‘zlariga ko‘ra, politsiyachilar qonunga zid ravishda harakat qilgan.
Xususan, qo‘lga olinganlarning hech biriga ularning huquqlari va nima uchun hibsga olinayotgani tushuntirilmagan, musodara qilingan mulk ro‘yxatga olinmagan. Hodisaning boshqa guvohlari reydni “kutilmagan hujum”, “qo‘pol munosabat”, “ochiqchasiga tahqirlash” deb atagan.
Qo‘lga olingan chechenistonliklar kechasi tuman ichki ishlar bo‘limiga olib kelingan va tonggacha yegulik va suvsiz ushlab turilgan. Ularning barchasidan barmoq izlari olingan, ularga qarshi hech qanday ayblov ilgari surilmagan.
Checheniston televideniyesining xabar berishicha, mazkur ish Rossiya prezidenti huzuridagi Checheniston vakolatxonasi nazoratiga olingan, ma’lumotlar esa Tergov qo‘mitasi, Ichki ishlar vazirligiga yuborilgan.
Izoh (0)